A osté les espées sans faire aultre mehain.
Puis dist a lui meïmes : Vecy tresor hautain.
Un present en feray Regnault ad ce serain.
Lor mist au roy Karlon un tyson en la main
Et li a fait couronne d’une torche d’estrain.
Maugis a roy Karlon la couronne livrée
D’une torche d’estrain qui fu toute enfumée,
Et puis li dist Maugis en faisant grant risée :
Karle, vous estes rois delez la cheminée.
Je prens congié a vous, s’enporte vo espée.
A Regnault mon cousin sera ja presentée
Et se ne fust pour tant, par la Vierge loée,
Qu’a trayson seroit ceste ouvre conparée,
La teste vous aroye tout maintenant ostée.
Atant es Guesnelon et sa grant gent armée
Qui vindrent droit as huis en faisant grant huée
Barons, ne dormez pas jusqu’a l’aube crevée.
Mais il se tenrent coy, ne respondent riens née
Adont est entré ens en menant grant porvée,
Mais si tost qu’il avoit de l’uis passé l’entrée,
Il cheoient l’un sus l’aultre souvin guelle baée.
Par Dieu, ce dist Maugis, or ay ce qui m’agrée,
Adont print une torche qui estoit allumée
Et vient a Guesnelon sans faire demourée.
La teste li eüst erranment decoppée,
Mais il se porpen[sa] d’en avoir renpronnée.
L’espée li osta et puis li a boutée
La torche en son menton qui estoit alumée,
Si qu’il li a la barbe trestoute arse et brûlée :
Puis li (a) dist : Guesnelon, ne say s’il vous agré
Je vous ay sans rasoir vostre barbe rasée.
Dites demain Karlon, droit a vo decevrée,
Que Maugis le vous fist droit a sa bien alée.
Si faitement Maugis les barons atourna
Et puis tout en un mont les espées trousa.
Il estoit pres du jour, mont peu de gent vellia.
Or vous lairay de lui tant que point en sera.
De Regnault vous diray a qui mont ennoya
Pour Maugis, etc.
Page:Castets - La Chanson des quatre fils Aymon, 1909.djvu/206
Cette page a été validée par deux contributeurs.
194
les quatre fils aymon
