Et dame son signeur et penser nuit et jour
A li servir en bien sans penser nul faux tour.
Ordre de mariage est de noble valour.
Einssement li preudons a la dame parla,
Le vie du bon duc haultement desclaira
Tout ainsi qu’il morut, ainsi c’on le tua
Et comment par miracle là en droit ariva
Et comment Dieux voloit qu’il demourast droit la
Et qu’en fiertre soit mis pour les biens que fait a.
Quant la dame l’oy, mainte fois se pasma.
Là menerent grant duel qui longuement dura.
L’evesque de Tremongne la dame conforta
Et les freres aussi et bien leur conseilla
C’on mande le linaige en quel lieu qu’il sera
Pour honorer le cors qu’en fiertre on mettra.
Les freres l’acorderent qu’ainsi on le fera ;
Et la duchoise aussi a che fait s’acorda ;
Droit a Jherusalem messaiges envoia
Au noble roy Yvon que Regnault engenra ;
Et le mort de Regnault on li dit et conta
Et que le francque dame, se mere, li manda
Qu’il le viengne veoir a Tremongne de chà,
Et relever sa terre, nul si prochain n’y a.
Et quant le roi Yvon celle chose escouta
Pour la mort de sen pere qui moult li anoia,
Mes il dist au messaige que point ne passera
Pour l’amiral Barré qui guerre li mena ;
Et pour tant rois Yvons longuement demoura
Qu’en Franche ne revient et sa terre laissa,
Dont par mauvais conseil rois Karles li osta.
Mais puis le roy Yvon si bien le calenga
Que encontre Karlon fierement estraia.
S’en esmut une guerre qu’a maint homme cousta
Du royaume de Franche ens ou tems qu’il passa.
Ivonnes li bons rois, qui tant ot de [renon]
