Ne aler au duc Bue que durement haon ! »
Dolans fu l’empereres, quant nus d’aus ne respont.
« Sire, dist li dus Naymes, bien vos conseilleron ;
Envoies i Loihier, vostre chier enfançon.
Li dus si l’amera, que de voir le savom ;
Si le vos amenra à ceste Rovoison,
Et voisent owec lui .cccc. compaignon,
Armés d’auberc et d’iaumes et d’escus à lion.
Bien porra dire au duc son voloir et son bon. »
Quant l’entent l’emperere, si en ot marison ;
Bien connoissoit le duc et sa fiere façon.
« Sainte Marie dame, ce dist li rois Charlon,
S’à Aigremont Loihier no chier fil trametron
Et li dus li ocist, jamais joie n’aurom,[1]
Ne jamais en no vie terre ne tendrion. »[2]
Dont se sunt escrié François et Borgoignon :
« Sire drois emperere, il ont dit à Charlon,
Ja desdis n’en sera, car nos tot le loon.
Or li dones errant le gant et le baston. »
Loihier sailli avant quel virent maint baron ;
Devant le roi s’en vint, si cria à haut ton.
« Emperere, dist il, mar aures marison.
Je ferai le mesage, el non saint Simion ;
Ja riens n’i celerai, si ait m’ame pardon. »
« Je redout molt, dist Charles, le duc qui est felon,
Que à vos ne se praingne là sus en son donjon.
Or parles sagement, ne soies pas bricon,
Et me dites au duc que sens arestison
Me wiengne tost servir à Paris ma maison,
Et soient ovec lui .cccc. compaignon.
Et se çou ne weut faire que nos vos devison,
De par moi li dires, mar i ait celison,
Que la mort d’Enguerran en fin li demandon
Qu’il ocist com traïstres et si li monstreron. »
Et Loihiers li respont : « Volentiers li diron.
Par la foi que vos doi, riens ne li celeron. »
Page:Castets - La Chanson des quatre fils Aymon, 1909.djvu/297
Cette page a été validée par deux contributeurs.
285
les quatre fils aymon
