Où l’on ne feïst duel, quant la chosse est oïe,
Por l’amor de Loihier qui avoit cortoisie.
Pensant et cheminant s’en vont par la chaucie,[1]
Que par nuit, que par jor ont lor voie acoillie,
Tant que il sunt venu en France la garnie.
Charles fu à Paris en la salle jonchie,
Et tint cort hautement de sa gent seignorie.
Grant joie demena cele bachelerie ;
Mais en ases poi d’ore aront chiere marie,
Que li mes s’en repairent qui vienent à haschie,
Ki aportent Loihier qui la face a noircie.
Uns d’aus se departi, qui ne s’atarga mie ;
Desi que à Paris a sa voie aquellie
Et monta les degrés de la sale votie ;
Là où vit Charlemaigne, hautement li escrie :
« Par ma foi, empereres, ne lairai ne te die,
Ici vient vostres flux qui perdue a la vie ;
Et toute vostre gent est morte et detranchie.
Li dus Bues d’Aigremont, cui Jhesus maleïe,
Si li copa la teste à s’espée forbie ;
Tot mort le vos envoie sor .i. mur de Surie.
Venes encontre lui, car je ne vos ment mie. »
Comme Charles l’entent, si ne set que il die.
Il est cheüs pasmés devant sa baronie,
Si qu’il ne pot parle[r] d’une liue et demie.
Naymes l’en releva et li rois d’Ermenie,[2]
Bueves, li dus sens barbe, et li quens de Rossie.
« Avoi, sire, font il, ici a vilonie.
Por amor Dame Deu, ne vos esmaies mie ;
Mais penses que li dus ait perdue la vie,
Et qui vos en faura, Jhesus le maleïe. »
Quant li rois l’entendi, si ne set que il die.
« Baron, dist Charlemaignes, por Deu le roi amant,
Et car me conseillies, car je sui molt dolant
Del duc Bue d’Aigremont qui si me va menant,
Ki m’a ocis mon fil et le preu Enguerrant.
