Or et argent et pailes vos donrai je asses.
Naimes, dist Charlemaignes, à moi en entendes,
Et vos et Galerans qui tant aves bontés,
Et Richars li Normans, li bons dus honorés,
Vos conduires l’engarde à .xxx. mil armés
Et porprendes la terre environ et en lés
Et destruies la terre : telx est ma volentés. »[1]
Et cil ont respondu : « Si com vos commandes. »
A itant l’ont laisié li prince et li baron,
Desi que el demain que soleus pert par font,[2]
Que Charles se leva, li rois de Montloon,[3]
Chauça soi et vesti quel virent maint baron.
.iiii. cors bugheres fist soner de randon,[4]
Et li os se commuet d’entor et d’environ.
De Paris sunt torné, ensi com nos disom,
Et trespassent la terre et l’ample regiom.
Ne sai que vos contasse des jornées le nom ;[5]
Tant a chevalchié Charles, li rois de Montloom,[6]
K’entrés est en la terre le duc Bue d’Aigremon.
Le feu i a fait metre entor et environ.[7]
.i. mesages s’en torne à coite d’esperon.
Desi à la cité ne quist arestisson.
El palais est venus sor .i. ceval gascon ;
Où que il vit le duc, si l’a mis à raison.
« Sire, Jhesus vos gart qui estora le mont.
Par la foi que vos doi, noveles vos diron.
N’est mie de merveille, se nos esmerveillon,
Que Charles vient sor vos, li rois de Monloon,
Et o lui .c. m. home qui vienent de randon,
Armés d’aubers et d’iaume et d’escu à lion.
Onques Dex ne fist home, par verté le disson,
Se il le het de mort, n’en doive avoir friçon.
