Page:Castets - La Chanson des quatre fils Aymon, 1909.djvu/323

311

les quatre fils aymon

Desos la bocle à or li ala porfendant,
Si que par mi le cors li va outre boutant.^[1]
Mort l’avoit abatu de deseur l’auferrant.^[2]
« Outre, dist il, cuivers, ja n’en ires jabant. »
1190Puis est passés avant, n’i ala atarjant,
Et a sachié l’espée à or reflamboiant
Et feri .i. François sor son hiaume luisant ;
Desi en la cervele l’ala tout porfendant,
Mort l’avoit abatu tres devant Galerant,
1195Puis crie Rossillon ! à sa vois hautement :^[3]
« Por l’amor Dame Deu, baron, feres avant. »
Atant es vos Doon à esperon brochant
Et le duc d’Aigremont et Aimon le vaillant^[4].
Là peüsiez veoir .i. estor si pesant,
1200Tant chevalier abatre et ocirre à torment ;
De sanc et de cervele va la terre jonchant
Et l’un mort deseur l’autre à la terre gissant ;
Et tant chevaus i va ses reines traïnant,
Qui estraier s’en fuient, de seignor n’ont garant.^[5]
1205Se li dus est dolans, ne cuit Charles s’en vant.

Forte fu la bataille aval parmi le pré.^[6]
« Dame, dist li dus Bues, qui portas le fil Dé,^[7]
Vos me gardes mon droit que ne soie afolé ;^[8]
M. 33Et dones que je vainque l’empereor membré,^[9]
1210Tant que soiom ensamble bonement acordé,^[10]
Ou il s’en voist ariere en France, son reigné. »

1. 1187 BC Et le hauberc del dos li ala desmaillant.
2. 1188 BC l’a jus abatu.
3. 1195 C omet ce vers conservé dans B.
4. 1198 B Aimon. C Aimes.
5. 1204 Manque à BC.
6. 1206 Après ce vers BC ajoutent : Onques ne fu si fiere en cest siecle mortel.
7. 1207 BC Sainte Marie dame, dist li dus honorés (C coronés).
8. 1208 BC mon cors.
9. 1209 C l’empereor faé.
10. 1210 BC Tant qu’il soit à mon frere paiez et acordez. Après ce vers le texte de BC est :

    Gardez ne reculles, por Deu de majesté,
    Que .K. s’en revoist dolanz et aïrez.