Jamais ne rentreront là donc i sunt venu.
Et li vasal remontent, lor cheval sunt crenu,
Et traient les brans nus, molt par i ont feru.
Remontés est li dus sor son cheval corant,
Poignant par la bataille isnel et remuant ;
Et dist Grifs d’Autefueille : « Tot somes recreant.
Ja i morrai de duel se ne somes venjant.
Baron, ales avant, ne soies atargant
Et si feres Buevon sor son escu devant ;
Et se il vos eschape, par le cors saint Amant,
Dont porra il dire que somes recreant. »
Et cil li respondirent : « Nos ferons vo commant. »
En Grifon d’Autefueille ot chevalier felon.
Il escria s’ensaigne : « Car i feres, baron. »
Et si firent [il] sempres, sens nule arestison ;[1]
Dont i ot grant bataille et forte chaploison
Et fiere la meslée et forte ocision,
Et l’uns mort desor l’autre i chaï à bandon.
Tant vaillans chevalier i parut li poumon,
Tant i fierent et chaplent, n’est se merveille non.
Lors vont amenuisant la gent au duc Buevon ;
Ne sunt mais que .lx. de verté le savom.
Es vos Grif d’Autefueille brochant à esperon,
La lance porte droite, destors le confanon ;
Emmi la greignor presse fiert le duc d’Aigremon ;
Le haubers li fausa, con se fust auqueton ;
Les le costé li met son espié à bandon ;
Tant com lance li dure, l’abati et sablon.
Li dus vost rasaillir el destrier aragon,
Quant es vos à travers un traïtor felon ;
Fiert le cheval au duc ens el costé parfont.
Parmi le cors li met la lance et le pignon,
Tant soef l’abat mort qu’il n’i fist braïson.
Comme li dus le vit, si en ot grant friçon ;
Il ne le vossist mie por tot l’or d’Avalon.
Il a sachié l’espée dont à or est li pon
Et feri Elinant parmi son hiaume enson
- ↑ 1582 Ms. i sempres.
