Desi à Montessor ne se vost atargier.
Renaus ala encontre, va son frere baisier,
Puis li a demendé belement, sens tencier :
« Richart, biaus tres dous frere, dont vos voi repairier ?
Où fu pris cil hernas, nobile chevalier ? »
Et Richars respondi, ki le corage o fier :
« En la moie foi, frere, à celer ne vos quier.
Aalart, que dis-tu, par cors S. Richier !
Ja nus hon ne devroit nule rien commencier,
[Se nel metoit ad fin, che t’os bien affichier.
Chi est tous li avoirs, li ors, et li denier.
Bien nous en tenroit Charles à recreant lanier.
Se pour paour de li laissiens chechi arrier.
Se chest avoir poons en la roche puier,
Ne sera despendus devant un an entier.
Moult en ferons le roy durement courechier.
Jamais si bien de lui ne nous poons vengier ;
Et si me tournera à moult grant pourficier.]
Ja Dex li rois poissans ne me gart d’encombrier,
Puis que Dex m’a doné cest avoir gaaignier,
Se je ja le guerpis de tot .i. an entier,
Tant qu’il en seront mort .xl. chevalier.
Par foi, dist Aalars, je t’irai donc aidier.
Isnelement et tost descendi del destrier.
Tot maintenant s’en va à la roe apoier
Et Guichars d’autre part refu au senestrier.
Et Richars est montez desus .i. olivier,
Et frappe les chevaus, si commence à huchier :
Seignor frere, avant, por Deu le droiturier !
De cest avoir seront riche li soudoier.
Teus assemble l’avoir à petitet mengier,
A jeüner le jor et à la nuit veillier
A povrement vestir, à sovent baaillier,
Que il fait poi de bien, ce puet on tesmoignier.
Je me fi bien en Dieu qui tot a à jugier
Que se nos en poons à tot ce repairier,
Que cil qui l’amassa le comperra moult chier.
Qui donc veïst Guichart et Aalart le fier
Et Richart les chevaus et destraindre et coitier,
Des jenous et des mains à la terre apoier ;
Les pierres engouler et as dens ecragier,
Moult par eüst dur cuer qui n’en eüst pitié.
Tant lor a Dex doné à cel cop esploitier
Que hors sont del mal pas, n’i ot qu’esleecier.
Or s’aroutent apres tout .iii. li chevalier.
