« Baron, ce dist Renaus, se vos plaist, entendes :
Gardes que chascuns soit et sages et membrés.
Quans somes nos çaiens de chevaliers armés ? »[1]
A .vi.c. chevaliers les a Guichars esmés.
« Certes, ce dist Renaus, nos en avons ases. »
Parmi les Alemans seront ja aroutés ;
La nuis est parvenue, solaus est resconsés.
Il ovrirent les portes, Renaus s’en est tornés ;
Baiars à l’orisele fu devant lui menés.
Li baron s’en issirent, es les vos aroutés.
Renaus se regarda qui fu preus et senés ;
Son manoir a veü, sel beneï asses
« Chastiaus, ce dist Renaus, vos soies honorés.
.v. ans a acomplis que vos fustes fermés.
Molt ai eüs en vos richeces et plantés ;
Or m’en estuet issir, quant vos estes gastés.
Certes tant sui je plus correciés et irés. »
Por poi qu’il ne se pasme, tant estoit adolès.
« Sire, dist Aalars, par mon chief, tort aves.
Ja por chastel bastart grant duel ne demenes.
Ja ne verres .ii. mois acomplis et passés,
S’en aures vos .i. tel que miols valra asses.
.i. conseil vos donrai, se croire me voles ;
De çou ne faites duel k’amender ne poes,
Mais chevauchies à force, si vos achemines. »
« Frere, ce dist Renaus, bien sai que vos m’ames.
Or soit donc mes hernas maintenant aroutés. »
Or ont cil del chastel le conseil entendu ;
Lor hernas apresterent, si se sunt esmeü.
Desi qu’as Alemens sunt li baron venu,
Que li .i. ne li autre n’en orent nul veü.
Là furent li grant cop doné et despendu,
Là ot tant cors sens arme, tante teste sens bu,
Tant hauberc jaserant desmaillié et rompu.
Quant li hernas fu outre, grant joie en ont eü.
L’emperere le content si ami et si dru
Que li fil Aymon sunt fors del chastel issu.
- ↑ 2787 M as armez conreés.
