De pitié et de duel sunt li frere pasmé.
Renaus les en redrece, ses a reconforté.
« Si m’aist Dex, seignor, molt avons mal erré.
Trop somes folement en ceste terre entré,
Car n’i somes conduit ne de nul afié ;
Et s’Aymes nos puet prendre, à mort soumes livré. »
Richars dist à Renaut : « Vos dites verité. »
« Par ma foi, dist Guichars, molt aves fol pensé.
Ja somes nos d’Ardane issu et eschapé
Et de la grant mesaise où nos avons esté ;
Noir somes et velu com ours enchaiené ;
Ja ne seromes mais conut ne ravisé.
Or chevalchons ensamble, trestot aseüré.
Se nos dedans la vile poïssiens estre entré,
Ja ne se seriens mais, touchié ne adesé ;[1]
Et se nostre juïsse nos i sunt destiné,
Autresi somes nos à martire livré. »
« Certes, ce dist Renaus, tot m’as reconforté. »
A icestes paroles ont li baron erré,
Entreci qu’à Dordone ne se sunt aresté.
Parmi la maistre porte sunt en la vile entré,[2]
Mais il n’i furent onques conut ne ravisé.
Molt se sunt merveillié cil ques ont esgardé,
Et dist li uns à l’autre : « Cist où furent trové ?
Je cuit qu’il ne sunt pas de cestui païs nés. »
Chevaliers et borgois les ont araisonés :
« Ki estes, beles gens ? de quel païs venes ?
Estes vos peneant ? en quel liu converses ? »
« Seignor, ce dist Renaus, por coi le demendes ?
Ja vees que je sui uns hom molt mal menés. »
Lors a brochié Baiart, si s’est d’eus desevrés ;
Dusk’al maistre palais ne s’i est arestés.
A pié sunt descendu desos le pin ramés ;
Tous lor .iiii. chevaus ont illuec aresnés.
En la salle en monterent par les amples degrés.
Page:Castets - La Chanson des quatre fils Aymon, 1909.djvu/391
Cette page a été validée par deux contributeurs.
379
les quatre fils aymon
