« Enfant, molt iestes povre et mesaise aves grant.
Donc n’aves vos o vos chevalier ne sergent » ?
« Oïl, .iii. compaingnons, que n’en sunt vivant,
Qui nos gardent là fors chascun .i. auferrant. »
La duchoise l’entant, s’en apele Helinant.
« Ales moi là defors ces degres avalant,
[S]i prenes le cheval dant Renaut mon enfant,
Et les autres destrier, tout ensi le comant. »
En la mareschaucie les metes maintenant. »
Et cil li respondi : « Tot à vostre comant. »
Les degres avala del vert marbre luisant ;
Entreci as barons ne se va atargant.
Il les a apelés, si lor dit en oiant :
« Baron, ales lassus, ne soies delaiant.
J’enmenrai les destriers en cele estable avant. »
Et cil li respondirent : « Tot à vostre comment. »
Il li ont delivrés, il les enmaine atant
Et li baron monterent sus el palais errant.
« Seignor, ce dist dame Aie, bien soies vos venant. »
Deles ses .iiii. fius les asiet en plorant.
Li mengiers fu tos pres, molt les va semonant.
Char ont de venoison et d’oiselin volant ;
Burent vin et claré à une coupe grant.
Es Ayme de Dordon parmi la porte entrant ;
Repairoit de chacier parmi la vile errant.
.iiii. cers orent pris à la muete corant.
Il descent au perron, sos le pin verdoiant,
Et monta el palais, .i. baston paumoiant,
Et a trové ses fils à sa table seant,
Qui furent nu et povre, nes vait reconoisant.
La duchoise en apele, si li dist maintenant :
« Dame, qui sunt cist home ? bien semblent peneant. »
Dame Aye l’entendi, si li dist en plorant :
« Sire, ce sunt ti fil que traveilliés as tant
As Espaus, en Ardane, où mesaise orent grant.
Or sunt venu à moi, qu’en ierent desirrant ;
Hesbergié sunt anuit por Deu, le roi amant.
Page:Castets - La Chanson des quatre fils Aymon, 1909.djvu/394
Cette page a été validée par deux contributeurs.
382
les quatre fils aymon
