Renaus le vit venir, si est encontre alés,
Ses bras li mist au col, si l’a bien acolés ;
Quatre fois le baisa par molt grant amistés.
Biaus niés, ce dist Renaus, où aves vos estés,
Pieça, que ne vos vi ? molt en sui aïrés. »
« Sire, jo vien de France, où jo ai conversés.
En la cité d’Orliens ai un tresor emblés ;
Charles nostre emperere l’i avoit asamblés.
Quatre somier amaine d’or et d’argent torsés.
Icil vos seront ja à estrine donés. »
« Cosin, ce dist Renaus, Dex vos en sace grés,
A icestes paroles sunt li baron montés.
[Aymes][1] ist del vergier, ki le cuer ot irés ;
Encontre els est venus volentiers et de grés.
« Vallet, ce dit li dus, bien vos ai regardés.
Or estes vos garnis et d’armes conreés
Et cauciés et vestis et tres bien afublés ;
De l’or et de l’argent emportes à plenté ;
Si aves bons cevax où vos estes montés.
Ne sai se ja en France en sera mais parlé. »
« Sire, ço dist Renaus, ce est en Dame [Dé][2].
A l’issir de la [ville][3] ont grant dol demené.
La duçoise se pasme sor son mul sejorné ;
Chevalier et borjois ont ensamble parlé.
Or s’en vont li dansiel de Dordon la cité ;
Ja n’i renterront mais en trestot lor aé ;
Mais si feront encore, se Dex l’a destiné.
Vont s’en li fil Aimon, ne s’asseure[nt] mie.
.vii.c. chevaliers a en la lor compaignie,
Et Maugis li cortois les enconduie et guie,
Et trespasserent Bause, si ont France guerpie.
Parmi [le Gastinois][4] ont lor voie acuellie ;
A Orliens passent Loire ; la tiere ert desertie,
Li [.iiii.] fil[5] Aymon l’avoient si gastie.
