Ja sera li estors mervelloz et pleniers. »
Puis a dit à ses freres : « Car vos aparellies.
Faites soner Bondin [et][1] si vos en issies. »
« Sire, dient si frere, tot à vostre congié. »
Il vestent les haubiers, s’unt les hiaumes laciés
Et çainent les espées as pons d’or entaillés
Et montent es cevax, les escus embrachiés ;
Puis font soner Bondin, es les apareliés.
Renaus a dit au roi : « Or ne vos esmaies.
Montes, vos et vostre home ; gardes [ne] vos targies.
Nos en irom devant et vos venes detriers.
Certes mar i entrerent li cuivers renoiés. »
« Amis, ce dist li rois, forment me rapaies.
Dame Dex vos garisse ki en crois fu dreciés. »
Renaus sist sor Baiart, armés et haubergiés,
Et s’escria ses homes : « Poignies, ne vos targies. »
La grant enseigne porte, dont d’or fu la moitiés
Et l’autre de cendal ricement entallié.
De la porte s’en ist poignant, tot eslaissiés,
Et ac[u]ellent[2] paiens ki les ont damaigiés.
Plus de demie liue [s’unt][3] le cembiel caciés ;
Ultre l’agues les suient, ce fu delx et peciés.
Li sire de Tolose ne s’est mie targies ;
[Entre] li[4] et ses homes est molt tost desbuciés,
Sonent cor et buisines, es les vos eslaissiés.
Renaus les voit venir, molt en est merveilliés ;
Il a dit à ses omes : « Or ne vos esmaies,
Car anqui [serai][5] molt alosés et proisiés,
Ou à tote ma vie honis et avelliés. »
« Sire, dient si home, ales, ne vos targies.
Se bien voilies ferir, ja n’en estordra piés. »
Li sire de Tolose ot molt gens aünée.
Là où il desbusierent de la selve ramée
Sonent cor et buisines, grant joie ont demenée
