Bien aves esploitié, Dex en soit aourés. »
L’emperere en apele ses drus et ses privés.
« Baron, dist l’empereres, quel conseil me donres ?
Gardes que Escorfaus soit bien emprisonés.
Je ne kerrai païens, qu’il sunt desloiautés. »[1]
Et cil li respondirent : « Si com vos comendes. »
En une chartre aval fu Escorfaus menés ;
Illuec fu par les piés en .i. aniaus fermés.
L’empereres comende qu’il soit molt honorés.
Lors fu li huis des chartres verroilliés et serrés.
O le roi fu Richars, Sanses et Othoés ;
A mengier et à boivre ont à lor volentés.
« Naimes, dist l’emperere, por Deu, que me dires ?
Comment le fist mes niés quant as Turs fu meslés ? »
« Sire, ce dist dus Naimes, por coi le demendes ?
Onques puis que Jhesus fu en la crois penés,
Ne fu tex chevaliers veüs ne esgardés
[Com est vostre neveu, Rollans li adurez],[2]
Et Saines et païens a tous desbaretés.
S’il avoit .i. cheval qui si fust abrivés,
Qui vo neveu portast, quant il seroit armés,
En cel liu ne seroit ses anemis trovés
Qu’il ne fust mors et pris ou à honte livrés. »
« Naimes, dist l’emperere, por Deu, que m’en loes ?
Où iert li chevaus pris qui si ert abrivés
Dont Baiars soit atainz et ses sires matés ? »
« Par mon chief, ce dist Naimes, se mon conseil crees,
Je le vos donrai tel que bon cheval aures.
Faites crier .i. cors qui bien soit devisés,
Par de desous Monmartre, delés Saine, ens el prés ;
Vostre corone d’or al chief del cors metes
Et .cccc. mars d’or et .c. pailes roés.
Molt iert grans li avoirs, si sera covoités.
Qui le cors porra vaintre, cuite li clameres.
Ja de l’or ne des pailes point ne lor retolres.
Les barons qui ci sunt, vostre congié dones.
Page:Castets - La Chanson des quatre fils Aymon, 1909.djvu/433
Cette page a été validée par deux contributeurs.
405
les quatre fils aymon
