Del vergier sunt issu, s’ont congié demandé
Et li frere lor ont tot en plorant doné ;
Le fil au viel Aymon qui tant a de bonté ? »
« Oïl, a dit Maugis, par le cors honoré,
Toute jor avons nous avec sa gent erré.
Il n’est pas loing de ci, demi lieue d’assez. »
Et tant com il parolent, Regnaus n’a mot sonné.
Et Naimes a Maugis de rechief apelé :
« Et ciz vassaux qui [est sor ce destrier monté,
Certes il m’est avis qu’il a mauvais pensé] ;
De quanque nous parlons, il n’a .i. mot soné. »
« Sire, il est mes fiz, dit Maugis li senés,
Mais il a en Bretaingne longuement demoré. »
Et Naimes va avent, par le frain l’a combré,
Puis li dist belement : « Amis, qu’as empensé ?
Cognois-tu ce Regnaut de cant avons parlé ? »
Lors respondi Regnaus, [n’i a plus arresté,
Ne dist mot de françois], si a breton parlé :
« Cheval Paris coronne Charles l’a commandé.
Bretaingne mon païs l’en vorrai ge porter. »
Quant ce oï dus Naimes, si a un ris getté,
Et dit : « A cent dyables soies tu commandés !
Car ne sai que tu dis ne que un forcenés. »
Atant s’est eslaissiés et cil s’en sont tornés,
Antresi qu’à Paris ne se sont arestés.
Par la porte major sont en la ville entrés.
.i. ribaut encontrerent qui mont fu mal senez.
Icil cognut Regnaut, si l’a bien ravisé ;
Hautement s’escria : « Or est Regnaus trovés ! »
Tuit cil qui l’entendirent sont celle part alés.
Li ribaus fu hardiz, si est avent alés,
Et a saisi Regnaut par l’estrier noelet.
Quant Baiars le santi, si a le pié levé ;
Tel cop li donne ou piz, li a le cuer crevé.
Tuit cil qui le cop virent, s’en ont riz et gabé ;
Et dit li uns à l’autre : « Ciz est mal confessé ! »
Et Regnaus s’en passe outre, et Maugis li senez.
Ains des borjois ne furent conut ne ravisez.
Parmi le viel marchié se sont acheminez.
Les ostés sont tous pris, mont furent effraez.
Ou viel marchié se sont povrement ostelez
Chiez .i. cordouannier qui mont ot mal pensé.
La partie propre de l’épisode comprend la valeur de deux colonnes d’un manuscrit de dimension moyenne. Il serait donc possible que l’absence de ce
