Et por s’espée perdre ait .ii. mars de deniers,
Et soies preus et sages et larges vivendiers.
Ne soies as barons, ço gardes, mençoigniers ;
Kar tot paiera Charles, se Dex garist mon cief.
Se li rois Charles vient por no vile essillier,
Se ne le vos rent pris, moi tenes mençoingnier,
Ça dedens Montalban, voiant .m. chevalier,
Si qu’il auera [liés] les poins et les .ii. piés,[1]
Et si li benderai andeus les oels del cief. »
Qant Renaus ot oï que dist Maugis ses nies,
De la joie qu’il ot, li est ceüs as piés.
« Cosin, ce dist Renaus, se iço me faisies,
Vos homs seroie liges, acatés à deniers. »
Or vos lairai de cels ki molt sont esmaiés,
Si vos dirai de Charle qui France a à baillier.
L’emperere de France a apelé ses homes ;
Par molt grant amistié encor les araisone.
« Seignor, çou a dit Charles, par saint Pierre de Rome
Jo porterai à Blavie avoec moi ma corone.
Nel lairai por roi Yon, ce sacies, ne por home.
Par saint Pol de Ravane, jo li ferai grant honte,
Jo li ferai la barbe et tot les gernons tondre
Et si li abatrai hors del cief la corone.
Rois abatus sera tant com vivera longes. »
« Sire, dist li dus Naimes, nos grans jans i menromes.
Se Deu plaist et saint Piere, molt bien les conqueromes. »
« Ensi ne di jo mie, baron, dist Charle maignes,
Ains vo di et commant que nus, n’en i remaigne
Des jantis chevaliers, nus qui espée ceigne.
Or manderai par non tos mes barons ensanble
Et trestos ces de Gales et d’Escoce et de Flandre.
Si manderai Englois et mes barons ensanble,
Angevins et Breton et trestos cels del Meine,
Si aurai Poitevins et tos cels de Romaine,
Angevin et Breton ço ert bele compaigne ;
Borguinon, Loherenc, cil se tendront ensamble.
- ↑ 5331 complété par Michelant.
