Adont parla li rois par molt grant cruauté ;
Tres bien l’ont entendu et demaine et casé.
« Ydelons, dist li rois, trop aves sermonné ;
Bien saves de Renaut dire le parenté,
De Maugis le baron et d’Aallart l’aisne.
De Ri[chart], de Guichart, molt en aves parlé.[1]
Par vostre traïson a Reingnaus tant duré.
Por ço ave[s] le vos entre vos deporté ;[2]
Mais par icel Apostre c’on quiert en Noiron pré,[3]
Par saint Denis de France qui est nostre avoé,
Il n’i a nul de vos de tot son parenté,
S’il deportoit Renaut en estor aduré,
Que il ne soit pendus ou en prison jeté. »
« Sire, ce dist dus Naismes, mar fuisent onques né ;
Par els sera li mondes à grant honte livré. »
Monbendel a assis Charles li emperere :
Ses homes apela, dist lor raison membrée :
« Segnor, [or] entendes por la vertu nomée :[4]
Molt est fors cis castels, soz cele tor quarée.
Hé dex ! est il Renaut et Aalart son frere ?
N’en torneraie mie, por noif ne por gelée,
S[e]s auerai tos pendus par la gole provée.[5]
Sacies qui est la sus, sans nule demorée.
Dus Naimes, vos ires [et Ripeus de Saint Sere],[6]
Et Richars li Normans à la barbe meslée.
Faites moi mon mesage en cele tor [quarrée].[7]
Si me dites à cels de cele tor fundée.
S’i se tienent vers moi desi à l’ajornée,
Et jo les pren par force, par l’arme de mon pere,
Trestos seront pendus ains demain l’ajornée. »
Li .iii. conte s’en tornent sans nule demorée
Que desci qu’à castel ne fisent demorée ;
Il montent sor le mur, al portier escrierent :
