Vo sereur li donastes o molt grant seignorie ;[1]
Montauban li donastes sor la roche naïe.
Plus est dotés Renaus en Gascoingne la riche,
Et Aallars ses freres et Maugis li traïtres,
Que vos n’iestes, dans rois, nel vos celerai mie.
Ne sai que le celasce ne por coi en mentisse.[2]
Se il puet esploitier, il vos toldra la vie.
Je vos lo en droit moi que que li autre dient :
Rendes à Charlemaigne Renaut et sa maisnie ;
C’est li mieldres consaus que je vos sache dire. »
Apres parla Raimons, .i. quens qui tint Tolose ;
Cil estoit molt poisans et si estoit preudome.[3]
« Sire, ce dist li quens, cestui ne crees onques.
En fin vos velt honir qui tel conseil vos done.
Je conuis bien Aymon à la fiere persone ;
Il est molt jentis hom, si a en lui preudome.
A grant tort ocist Charles son frere Buef le conte ;
Se Renaus s’en venja de Bertolai le conte,
Ja nus frans chevaliers nel doit tenir à honte.
Si fera il des autres, se a lui s’abandonent ;
Car bons chevaliers est, nul itel ne savomes,
Ne li deves faillir por riens qu’il soit el monde,
Qui à Renaut falra, dame Dex le confonde. »
Apres parla Antoines qui le poil ot flori ;
Dame Dex le confonde, qui onques ne menti.[4]
« Sire, rois de Gascoigne, entendes ça à mi.[5]
Molt aves povre sens, por voir le vos afi,
Qui laisies les barons l’un l’autre desmentir.
Voles vos conseil querre, dont vos puissies garir
Et vo gent et vo terre à grant honor tenir ? »
« Oïl, dist rois Yons, por amor Deu vos pri,
Sor le peril de l’ame, par devant Jhesu Crist,
Commencies la parole, si penses del fenir. »
