[Et] l’anel de son doi li a li rois doné.
[.I.] bon mul de Sulie li avoit presenté
[Et] les .iiii. mentiaus a derrier lui trossé
[Et] .iiii. peliçons qui sunt à or bandé.
Or s’en va li mesages, s’a congié demendé.
Or s’en va li mesages, congié a pris del roi,
Et Charles est remes, si s’apoia au dois.
Fouque de Morillon en apela à soi,
[Et] s’apela o lui Ogier, le bon Danois.
« [En]tendes moi, dist Charles, franc chevalier cortois,
[.I.] conseil vos weil dire, mais ce iert sor vos fois,
[Que] desi au besoing nel sauront que [n]os trois ![1]
[H]ui finera la guerre dont je sui si destrois.
[O]r oes .i. petit, dirai vos mes secrois. »
« [S]ire, ce dist Ogiers, tant vos sent à cortois
[Que] ne nes querres chosse qui nos tort à sordois. »
« [N]on voir, dist Charlemaignes, ja mar le cuiderois.
[E]s plains de Waucolors le matin m’en irois ;
[.iiii.] mil chevaliers ensamble o vos menrois ;
[iiii.] fores i a où vos embuncherois.
[Les] .iiii. fils Aymon illuecques troverois.
[J]e comant, mors ou vis, que vos les me rendois. »
[Qu]ant cest afaire entant Ogiers, li bons Danois,
[S]avoir poes et croire que molt en fu destrois,
[Et] dist entre ses dens que nus ne l’entendoit :
« [J]a dame Deu ne place, qui haut siet et loing voit,
[Que] vos ja les aies par home qui ci soit. »
« [A]les ent, ce dist Charles, si feres mon esploit
[Et] se vos bien le faites, par la foi que vos doi,
[J]a ne volres en France que doné ne vos soit. »
« [J]a n’en conois je nul », ce dist li bons Danois
« [S]i faites, par mon chief, ce dist Charles li rois,
« [C]ar il sunt vo cousin, li traïtor re[n]oit.
[D]e tant sui je soupris que le vos dis ençois.
[M]ais vos me jureres, sor la veraie crois,
[Qu]ant vos en Vaucolors les barons troverois,
[A] vo pooir feres, ja ne vos en faindrois,
- ↑ 6174, 6195 L vos.... revoit. Fautes du scribe.
