.i. lit li fissent faire el palais principé ;
La keute fu de paile galasien fresé ;
Li covertor de soie furent de gris forré,
Et li rois se [coucha], s’a son cors repossé,[1]
Mais il ne dormist mie por .xiiii. cités.
De sor les fius Aymon atorne son pensé
Et dist entre ses dens belement et souef :
« Ahi ! peres de glore, com je ai mal ovré
Des .iiii. meillors princes de la crestienté,
Que j’ai vendus à Charle et traïs et livrés !
Demain seront pendu, ja n’ierent trestorné.
En la loi de Judas ai je pris mon ostel.
Dame Deu en perdrai en fin sens recovrer.
Ja par home de char ne serai acordés ;
Mais tot si l’estuet faire, com je l’ai devisé. »
Sor la keute de paile laisa son chief cliner.
A l’issue de Mai, k’estés est comenciés,
Se fu li rois Yon el chastel herbergiés.
Venus fu de Toulouse, la fort cité, le sié,
Et a les fius Aymon traïs et engingniés.
Renaus, li riches ber, repaire de chacier
De la forest d’Argone où il fu archoier.
.iiii. [somiers] amaine de venison chargiés ;[2]
S’a pris .iiii. senglers qui molt l’ont traveillé ;
Ensamble o lui ses freres que li bers ot molt chiers
Et ses chiens et ses viautres et ses veneors fiers
Et bien trente sergens qu’à cheval que à pié,
Qui portent ars d’auborc et sajetes d’acier.
En Montauban entrerent par la porte Fouchier.
Renaus ot par ces rues noise des escuiers
Et des haubers roler et des chevaus torchiés
Et crier par ces perches ces faucons monteniers.
Adont cuida li dus, ce fussent chevalier
Qui là fussent [venu] por avoir gaaignier.[3]
« Hé Dex ! ce dist Renaus, qui sunt cist chevalier
