Paris à Orliens et Rains à Monloon,
Que vos nos rendes pris l’empereor Charlon.
Ains i aures perdu le maistre chaperon.
Se vos ataing à cop, ja n’aures garisson.
Fouques, ce dist Renaus, ce fu grans mesprison
Quant avoir en donastes au riche roi Yon,
Ne avoir en presistes ; ce fu grant traïson,
C’est li plus grans pechiés que puist faire nus hom.
Une riens vos dirai, molt feres que preudon,
Dont aures los et pris el roiaume Charlon,
Ne ne dira ja nus que çou soit traïson,
Et li vostre home lige tot .iiii. devenron ;
Si vos donrai Baiart, mon destrier arragon,
Certes que ne donasse por nul avoir del mont ;
Montauban vos donrai, la tor et le dongon.
Se Charles vos fait guerre, nos vos receteron ;
A .cccc. chevaliers tous tans vos serviron ;
Ja mar auront del vostre vaillissant .i. boton.
Tant guerreoierons Charle que acordés serom.
Ja ne seres restés que çou soit traïson.[1]
Si nos partes .i. champ que nos vos nomeron ;
A meschief le prendrai, mais avant ne poon
Que vos prenes à chois .xx. de vos compaignons
Des meillors chevaliers que trover i puist on,
Ou François ou Normans ou Englois ou Bretons ;
Ja mar i perdront d’armes vaillisant .i. boton.
Nos ne somes que .iiii. as mules arragons,
Et si nen avons armes fors nos brans de color.
El non saint Esperit, si nos i combatron,
Et s’i nos pueent vaintre, no mort vos pardonon ;
Et se dame Dex done que vaintre les puisson,
Que nos n’i aions garde de tos vos compaignons.
Çou vos requerons nos, gentis fius à baron. »
« Par Deu, ce respont, Fouques vos parles en pardon.
Je n’en prendroie mie mil livres de mangon ;
Ainc mais ne fustes vos soupris à nul besong
Que n’eüsies Baiart et Maugis le larron.
- ↑ 6915 M Ja ne serez reté.
