Ki de mort suscitas le cors saint Lazeron
Et sauvas Daniel en la fose au lion,
Et garesis Jonas el ventre [del] poison,[1]
Dones hui, biaus dous sire, par vo beneïçon,
Que Rollans puist trover Renaut, le fil Aimon.[2]
Il m’a hui molt laidi devant le roi Charlon. »
Or vos lairons ici del rice roi Yon,[3]
Si dirons de Renaut, le fil au viel Aymon.
A Montalban en vi[n]rent li nobile baron ;[4]
Si descendent à tiere soz le pin au peron.
Devant lor vint Clarise à la clere façon,
Avec lui ai doi fil Aymonet et Yon,
Ki tant se sont hurté au mur et au perron,
Ne lor pert iols ne bouce, viaire ne menton[5]
Por l’amor de lor pere dont fu la traïson.
Il vont baisier lor pere le pié et le talon,
Et Renaus les enpaint del pié par tel iror,
Por poi ne lor a fait voler les iols del front.
Et la duçoise vait tost baisier son baron.
« Dame, ce dist Renaus, fuies vos de sor nos.
Ales à vostre frere, le mauvais traïtor.
Jamais à mon vivant n’arai à vos amor.
Ne remest mie en lui que perdu ne fuison.[6]
Or en iras à lui, à pié et sans garçon.
N’enporteres del mien vallant un esporon.
Ançois vos liverrai escuiers et garçons ;[7]
Comme feme venal vos abandoneron ;
Et mes enfans pendra[i] Aymonet et Yon,[8]
Car il sont del linage au traïtor felon. »
« Sire, ce dist la dame, merci, por Deu amor.
Sor Sains vos jur[er]ai orendroit à bandon,[9]
- ↑ 8509 L de. M du.
- ↑ 8511 M ajoute : Adobé de ses armes, sor Baiart l’aragon. Si verron com Rollans retendra le baron.
- ↑ 8513 M ajoute : Que Rollans en enmaine moult dolent et embron.
- ↑ 8515 L virent.
- ↑ 8520 Sic L M. B le vis et le menton.
- ↑ 8529 M pendu.
- ↑ 8532 M et gaschon.
- ↑ 8534 L pendra.
- ↑ 8537 L jurai. M jurerai. B juerrai.
