Il apele Yudelon et Torpin l’ordené.[1]
« Ales prendre les trives vers Rollant l’aduré,
Dites nos le vasal qu’il ment sa loialté,
Et s’il ocist Renaut, chier sera comparé ;
Mais guerpisse l’espié por la nostre amisté
Et si praingne .i. lance, si voist à [li] joster,[2]
Si l’en fiere .i. seul cop por sa foi acuiter,
Ou ja verra bien tost le mal en pis torner. »
Cil sunt, venu au conte, si l’ont araisoné :[3]
« Estous vos mande, sire, li chevaliers membrés,[4]
Que s’ocies Renaut, ne vos porra amer ;
Mais prenes .i. lance, laisies l’espié karré ;[5]
Si l’en dones .i. cop por vo foi acuiter. »
Comme Rollans l’oï, a poi n’est forsenés.
« Hé ! traïtor, fait il, tos vos confonde Dés,
Ki toles à mon honcle s’onor à conquester.
Je ferai orrendroit molt de vo volentés. »
Puis a dit à Renaut : « Bien soies desfiés.
Nos devons bien nos cors essaier et prover. »
Il brochent lor chevaus, es les vos des[sevrés].[6]
Tantost com il se voient, les covint assembler.
Qui donc veïst as contes ces fors escus lever
Et ces riches espiés paumoier et croler,
As .ii. meillors de France les peüst on [esmer].[7]
De çou fist molt Rollans que preus et que cortois,
Que il prist .i. lance à Guilleme de Blois.[8]
Quant Renaus l’a veü, molt en fu ses cuers noirs[9]
Et dist entre ses dens que nul ne l’entendoit :
« Rollant, li niés Charlon, trop menes grant bofoi,
- ↑ 9105 Metz : Estos en apela.
- ↑ 9110 Sic B M. L moi.
- ↑ 9113 Metz : Et Estous respondi : Si con vos commandes.
- ↑ 9114 Metz : Names vos mande, sire, et Ydelons li ber, Oliviers de Viane et lor grans parentés.
- ↑ 9116 M Metz : à un fer acéré.
- ↑ 9124 Sic B M. L Metz : desfiés,
- ↑ 9128 Sic B M. L Metz : conter.
- ↑ 9130 Metz : Gossiaume. B M à un fer viennois.
- ↑ 9131 Metz : se pot mervelloir. — 9137 M dant. Metz : à L manque. — 9147 B ajoute : Et Renaus tresbucha trez enmi le marois.
