Et se je ment ma foi, dont sui je Antecris.
Jamais honor n’auroie nul jor ennui païs,
Ains seroie honis, dolereus et mendis.
Ha ! .xii. per de France, à tous vos cri merci,
Que n’ocies Richart, mal seroie bailli.
Mais ki Richart pandra, de m’amor le desfi ;
A Durendart m’espée la covendra morir.
Et se il avient chosse que Richars soit ocis,
A Renaut me rendrai et serai comme pris.[1]
Li nons le duc Rollant sera mis en obli ;
S’aurai à nom Richart et lor charnex amis ;
Molt lor aiderai bien lor guerre à maintenir.
Se plus me quiert Renaus, bien iert de sens faillis. »
« Hé, glous, dit l’empereres, de Deu soies maldis !
Richart, je vos pandrai, molt vos valdra petit. »
Le duc Joifroi d’Anjo[u] a li rois apelé ;[2]
Cil se leva en piés, quant il s’oï nomer,
Et vint devant le roi, si l’a araisoné :
« Biau sire, que vos plaist ? dites vo volonté. »
« Joifroi, ce dist li rois, je vos ai molt amé.
Renaus ocist ton pere sos Balençon au gué,[3]
Aallars, ton neveu, sos Vairepane es prés :
Se vos n’iestes coars, vangier vos en poes.
Vos deves bien destruire vostre anemi mortel.
Or m’ales Richart pandre, le fil Aymon le ber,
- ↑ 10046 M B : A Renaut m’en irai, à lui me rendrai pris.
M place ici le discours à Olivier sur une rime en age :
Et vous, sire Olivier, dist l’emperere sage,
Vous estez de Viane, de moult riche parage,
Onques le vostre pere ne me fist jor outrage
De Valence et Lion arez le segnorage.
Si m’ales Richart pendre, que n’i ait arestage
Sire, dist Oliviers, je ne feroi tel rage.
Je ne weil encor mie si honnir mon lignage.
Va glout, dist l’empereres, Dix te meite à hontage.
Par mes grenons, dist Kalls., oiant tout son barnage,
Je ne lairoie mie por les Sains de Cartage,
Richart, que ne vos pende, maugré vostre lignage.
Li quens Gieffroy d’Anjou a le roi apelez. - ↑ 10053 L Anjo.
- ↑ 10058 A M oncle. Fait non mentionné ailleurs.
