Sachies, il n’aloit mie le pas ne le troton,
N’il n’aloit l’ambleüre ne les galos reons ;
Ains va les saus plus tost que ne vole faucons.[1]
Et Ripeus fu montés, ferme le caaignon,
Et vit covrir la terre des chevaliers barons.
Il fu si esbahis qu’il ne dit o ne non ;
Dont n’i vossist il estre por nul avoir del mont.
Lors a dit à Richart, le fil au viel Aymon :
« Or vos vient .i. secors ; ains si grant ne vit hon.
Or voi venir Renaut sor Baiart l’arragon,
Aallart et Guichart, le fil au viel Aymon.
Cist vos feront secors, gentius fius à baron.
Si m’aïst Dex, Richart, je n’i quis se bien nom.
Il n’i a plus ne mains, à vos me rent prison.
Gardes, sire Richars, n’i aie se bien nom.
Je le fis por l’estrif qui iert el paveillon ;
Car je savoie bien que auries secors. »
Richars dist coiement, à molt basse raison :
« Por coi me gabes ores, Rispeu de Ribemont ?
Certes se fust or ci Renaus, li fius Aymon,
Ne Aallars mes freres, ne Guichars li baron,
Je ne cuit qu’il soit hom nus si hardi el mont,
Qui des mois me fermast el col le chaieignon. »
« Par foi, ce dist Ripens, mie ne vos mentom.
Ves le ci où il vient, à .i. giet de baston.
Je ne vos quier mal faire, avales l’escaillon.
Tos tans vos cri merci, gentius fius à baron. »
« Ja ne soit il mes freres, Renaus li fius Aymon,
Ripeu, s’il ne vos pent à cestui caaingnon. »
Et Renaus li escrie à molt haute raison.
- ↑ 10564 Dans le secours porté par Maugis à Vaucouleurs, Bayard est au second rang : ici il est au premier, car sans sa vigilance Richard était perdu. Le cheval faé frappant le bouclier est une des images des éditions populaires : la rapidité de sa course, en cette circonstance tragique, fit de lui le destrier par excellence. Ici il est à l’apogée de sa destinée épique. L’intérêt qui s’attache à ses faits ne peut que s’amoindrir jusqu’au moment où sacrifié par ses maîtres à la conclusion de la paix, il sait tromper la rancune de Charles et s’enfuit dans l’Ardenne.
