Quant l’entant Charlemaignes, à poi d’ire ne font.
Il broche le cheval des tranchans esperons ;
Grans cols se vont doner es escus à lions ;
Desos les boucles d’or les fendent à bandon.
Des haubers c’ont vestus, desrompent li blaçon.
Ils briserent lor lances, s’en volent li tronçon.
Charles abat Richart tres enmi le sablon.
Richars se voit à terre, ainc tel duel n’en ot hom.
Il est saillis em piés à guisse de baron,
Et a traite l’espée ki li pent au giron,
Et vait ferir le roi parmi son helme amont
Que les flors et les pieres li abat à bandon.
.c. mailles li trança del [h]auberc fremillon.[1]
Le cheval aconsiut par derriere l’arçon ;
Tot le fent et copa et mist en .ii. tronçons.
Li rois se vit à terre, si dolans ne fu hom.
Il est saillis en piés à guisse de lion,
Et a traite l’espée qui li pent au giron,
Et vait ferir Richart parmi son helme amont
Que les flors et les pieres en abat en .i. mont
Et l’escu de son col li malmet et confont.
Et Richars refiert lui à guise de barom.
Charles cria Monjoie hautement, à cler ton.
Richars se traist ariere, li fius au vieil Aymon,
Et a sachié l’espée, si la traist contremont,
Et a saisi Bondin, sel sonne par vigor.
Quant Renaus l’entendi ens el brueilluet reont,
Et Aallars l’ainsnés et Guichars li baron,
Et Maugis se desrenge à guisse de faucon
Et vait devant les autres le trait à .i. bougon,
Et escrie : « Renaut, trop nos aseürom.
Je ai oï Richart nostre bon compaignon.
Il a souné Bondin par molt ruiste vigor.
Se Dame Dex n’en panse, jamais nel reverrom. »
Or s’en torne Renaus sor Baiart l’arragon,
Et .x.m. chevalier le suient à bandon.
Ainc ne fina de poindre, si vint à Monfaucon.
- ↑ 10802 L dellauberc.
