Et nos vos servirons volentiers et de gré ;
Et si vos prameton, par bone loialté,
Que nos ne finerons por vent ne por oré,
Si aurons Montauban contre terre versé.
Ja n’i remanra pierre en mur ne en piler ;
Le chastel destruirons et les murs par dalés.
Et qui voldra Renaut n’Aallart deporter,
Ne Guichart ne Richart ne Maugis le faé,
Qui tantes fois vos a souduit et enchanté,
Sachies, qui ceus voldra aidier ne conforter,
Nos l’ocirrons à duel ; de nos iert desfiés. »
« Seignor, ce dist li rois, tot çou laisies ester.
Sachies, ja en ma vie, à roi ne me raures,
Ne porterai corone en trestot mon aé,
Desi à icele eure que Renaut me rendres
Et Maugis le larron que je durement hé. »
Par mal talant s’en entre Charlemaigne en son tré.
De mal talant et d’ire a tot le cuer enflé.
Quant François ont veü le roi si enflamé,
Entr’els en sunt forment dolant et abosmé.
A icestes paroles que vos dire m’oes,
Est venus Oliviers, li vasaus adurés,
Et a veü le roi qui molt fu aïrés.
Quant Oliviers le vit, si l’a araisoné.
« Sire, dist Oliviers, por coi vos dementes ?
De quoi iestes vos, sire, correciés et irés ? »
« Par foi, ce dist dus Names, il nos a mal menés.
G[u]erpi a sa corone et nos a desfié. »[1]
« Sire, dist Oliviers, se vos plaist, non feres.
Mais prenes vo corone, vostre gent mai[n]tenes[2]
Et maintenes vo terre, si com faire soles. »
« Olivier, ce dist Charles, por noiant en parles.
Certes, je nel feroie por .xiiii. cités,
Tant que j’aurai Maugis ocis et afolé. »
« Sire, dist Oliviers, tot cou laisies ester.
Or soit vos maltalens as François pardonés ;
Page:Castets - La Chanson des quatre fils Aymon, 1909.djvu/655
Le texte de cette page a été corrigé et est conforme au fac-similé.
627
les quatre fils aymon
