« Renaut, ce dist Ogiers, awec nos en vendres.
Si prendres vos ostages et vostre seürté. »
« Ne sai, se j’oseroie, » ce dist Renaus li ber.
« Oïl, ce dist Ogiers, ja mar en douteres. »
« Voire, ce dist dus Namles, car bon conduit aures.
Aallart, vostre frere, ensamble o vos menes.
Et Guichars remenra et Richars li membrés
Et Maugis li cortois por le chastel garder. »
Renaus lor otria toute lor volenté.
Lors monte il .i. cheval con li a amené.
Car Baiart l’Arragon ne vost il pas mener,[1]
Et Aalars, ses freres, est autresi montés.
Et la france duçoise vait Ogier acoler,
Et duc Namlon de France a pris à mercier.
« Seignor, les vos mercis, dist la dame au vis cler,
De l’onor de Maugis que faites li aves.
Je vos bail mon segnor sor vostre loialté. »
« Dame, ce dist Ogiers, ja mar en douteres.
Nos le garderons bien, sens point de fauseté.
Nos ne li faurons ja à nostre poesté. »
Or s’en tornent ensamble, si sunt acheminé.
Dusk’à .x. chevaliers en a Renaus menés ;
De Montauban s’en issent et rangié et serré
Et trespassent les terres et les amples regnés ;
Vienent à Balançon, si sunt oltre passé ;
Jusque bien pres des loges ne finerent d’errer ;
Illuec sunt descendu sos .i. arbre ramé.
Ses compaignons en a li Danois apelés.
« Segnor, ce dist Ogiers, à moi en entendes.
Nostre emperere est fel et de molt mal pansé
Je me dout durement de Renaut l’aduré.
Si nos covient avoir del roi la seürté. »
« Par foi, ce dist dus Names, or aves bien parlé,[2]
Et entre moi et vos i convenra aler ;
Et Renaus remenra sos cel arbre ramé. »[3]
Ses compaignons en a li Danois apelés,
Page:Castets - La Chanson des quatre fils Aymon, 1909.djvu/675
Le texte de cette page a été corrigé et est conforme au fac-similé.
647
les quatre fils aymon
