Se Maugis ne li rent à faire son voloir.
Comme Renaus l’oï, si en devint vermoil,
Erranment se leva si qu’il ploia l’ortoil
Et apela ses freres et son autre consoil.
Quant or furent François tot levé en estant,
Renaus parla premiers, li vassaus combatant.
« Naymes, dist il, oiez, et vos, sire Rollant,
Ne me blasmez vos mes de cest jor en avant,
Se je conquier mon droit à mon acerin brant. »
Puis regarda le roi, si li dist en oiant :
« Bons rois, alez vos ent, s’il vos vient à talant.
Par icel Deu de glorie ki solel fist luisant,
Ja ne vos tanrai jor oltre vostre commant.
Vos estes mes drois sire, bien le vois conoissant ;
Ja ne vos desdirai por nul home vivant.
Quant Deu plaira et vos, sanz proier tant ne quant,
Si seromes ami ausi comme devant. »
Quant li François l’oïrent, molt s’en vont mervellant.
« Ha Dex ! ce dist dus Naymes au boen conte Rollant,
Tant est humilianz Renaus li conbatant. »
« Voire voir, dit Torpins, mervelles va disant. »
Quant Richars ot Renaut, si li samble mervelle.
« Renaus, k’avez vos dit ? Je cuit que c’est dorvelle
Que n’ociez le roi ki contre nos s’orguelle,
Et ja ne fera puis por rien k’en li [conseille] ;[1]
Ainz manace toz jors, si nos torne l’orelle ;
Si est en vo prison et en la vostre treille.
Por icel Dameldeu ki par tot le mont veille,
S’il nos tenoit ausi en sa tente vermelle,
Ne nos garroit tot l’or ki est jusqu’à Montroille,
Ne feïst de nos cors laidement la despoille.
« Renaut, ce dist Richars, vos en avez grant tort.
Vos poez faire pais et vos querez la mort.
Ne place Dameldeu ki fist et mer et port,
S’ensi s’en va li rois ki nos guerrie à tort,
Qu’il ne nos face pendre ou noier à un gort.
- ↑ 12894 L mentoive. Peut rester comme assonance, comme Montroille et despoille. M conseille.
