Amaisnier vos cuidames, s’eüst cascuns son regne,
Plus amissiez la pais ke nule autre gaaigne.
Mais or veons de voir, n’i volroit noient pene.
[Si sommez molt pené en ceste terre estraigne].[1]
Or asauronz sovent par puis et par montaigne,
Tant ke il seront pris, ki ke en ait engaigne.
Si en ferez justice selonc la lor ovraigne. »
Et li baron s’escrient de la terre romaigne :
« Sire, molt bien dit Naimes et molt bien vos ensegne,
Car creez son conseil, n’a tel prince en vo regne. »
Quant Charles vit ses homes ki li crient merci,
Il est sailliz en piés com hom amenevis.
Naimon en a levé, premerains le saisi,
Puis on lieve Rollant et les autres ausi.
« Baron, ce dist li rois, por voir est or issi,
Mais or vos gardes bien, je vos commant et pri,
De vos n’aient consel lassus mi anemi,
Que par icel seignor ke fel Judas vendi,
Se savoir le pooie, por voir le vos afi,
Tant [les] hé de mon cuer, por verté le vos di,[2]
Toz les jors de ma vie serionz ançoiz ci,
Ne soient pris par force, por voir le vos afi. »
Molt fu joianz li rois quant fu venus Rollans.
Il jure Dameldeu et ses dignes commans,
Renaut prendra par force, s’en fera ses commanz ;
Maugis fera ardoir le cuvert soduiant.
« Sire, ce dit Rollans qui tant estoit vaillant,
Maugis n’est pas lasus, si me soit Dex aidans.
Ier matin s’en fuï, parson l’aube aparant ;
Ne vos osa atendre, tant dote vo talant,
Que nel feïssiez pendre ou livrer à torment,
[Por ce qu’il vos embla ici entre vo gent.] »[3]
« Ha Dex ! dit Charlemaignes, ki feïs mer et vent,
Ne le tenrai je ja por faire mon talant ! »
Rollans fu amesniez, n’i a mes maltalent,
