Que li François i fuissent si demené vilment ;
Puis jura Dameldeu ki sauva Abrahan :
Ja ne s’en tornera por vent ne por lait tanz,
Ses aura afamez et toz mis en carkan.
Charles fu repairiés, mais encore manace
Qu’il les afamera, se il a tant d’espace.
Tant tref a fait destandre et metre en autre place,
Montalban asiet si et de sa gent l’enlace
Que nus n’en puet issir par engien que il face.
[Or à chascune porte, par le cors saint Huistace,][1]
A .vii.m. cevaliers, cascun armé la face.
Quant or le vit Renaus, dont ne set que il face.
Dameldeu reclama et sa saintisme grace
Qu’il ait merci de lui et que il paiz li face.
« Sire, ce dit Richars, por le cors sainte Agace,
Se je fuse creüz, par ceste moie brace,
Pais eüssonz de lui, n’i eüst mais manace. »
Por amor de Richart ki vait contraliant,
Fu molt irez Renaus, mais il n’en fait samblant.
Toz jorz fait bele ciere, molt les vait ahaitant.
Et Charles fu defors, toz jorz vait maneçant ;
De pais ne velt oïr nesun home vivant.
Ilueques fist il tant et les vait destraignant
Que laiens faut vitaille, molt va amenuisant.
Aval la rue plorent nes li petit enfant,
Que petit orent pain ; cascuns vait destraignant,
Ne la vent, ne la done, tant vont Charlon dotant.
A la menue gent aloit del tot faillant.
Par ces rues ploroient, sovent se vont pasmant.
Onques Dex ne fist home, tant eüst dur samblant,[2]
Qui n’en eüst molt fort le cuer tristre et dolant,
Qui veïst ces enfanz, lor meres alaitant,
Qui le sanc en arracent, tant le vont atirant.
Là dedens Montalban commença la famine.
Li uns amis por l’autre vait muçant sa quisine
Et li fix por le pere, li niés por sa cosine.
