Fors que sol une fois où perdi maint baron.
Ainz puis n’i assailli, ne jamais ne feron ;
Anuit me porpensai comment nos [les aron].[1]
Je voil si et comment que il n’i ait baron,
Ne face mangoniax, tant com deviseron,
Dont asaurons la vile ; de loing i rueron.
Lors maisons et lors sales là dedens confondrons,
Et s’il i a vitaille, molt lor en gasteron.
En si faite maniere molt lor en destruiron. »
Lors regarda Rollant, si li dit par son non :
« Rollant, faites en .vi., nos le vos commandon ;
Olivier, et vos .v., qu’il n’i ait acoison,
Naimes en fera .vi., tot ensi le volon,
Et Ogiers autretant, car esgardé l’avon.
Torpins en fera .iiii. devant son pavellon. »
Puis regarda avant, si a coisi Aymon :
« Aymes, faites en .iii., issi le cornmandon. »
« Hé Dex ! ce dist li dus, saint Jakes, saint Symon !
Comment le porrai faire, franc chevalier baron ?
Ja sunt ce mi enfant [et nos] les asauron ![2]
Ne sunt mie ribaut ne truant ne garçon,
Ainz sunt bon chevalier, nul m[e]illor ne savon. »[3]
Li rois le [regarda], si fronci le grenon,[4]
Et roelle les œlz, s’esgarde contremont,
Et a gringnié des dens, samblant fait de felon.
Molt se tint longement qu’il ne dit n’o ne non,
Et quant il a pensé, si parla à cler ton :
« Par cel signor, dist il, ki Longi fist pardon,
S’il en i a un sol ki die o ne non,
Ne face mon commant ensi com dit l’avon,
Je en prendrai la teste par desor le menton. »
Adont plora dus Aymes o le flori grenon :
« Ne vos coreciez mie, ne faites tel tençon.
Vo commanz sera fais, à .i. cief en trairon. »
Page:Castets - La Chanson des quatre fils Aymon, 1909.djvu/720
Le texte de cette page a été corrigé et est conforme au fac-similé.
692
les quatre fils aymon
