Et tot li prince i vindrent et por cel fait jugier.
« Aymon ce dist li rois, ne m’aves gaires cier,
Quant tu mes enemis dones si à mangier,
Bien sai tote t’ovraigne, tu ne te pues noier.
Par icel, Dameldeu [qui tot a à] jugier,[1]
Je m’en voil ainz la nuit si hautement vengier
Que le cief me laires, se on le velt jugier. »[2]
« Sire, ce a dit Aymes, pas ne le doi noier,
Je vos di loialment, sans autre parçonier,
Se vos me deviez dedens un fu lancier,
Ne faurai mes enfans, tant com lor puisse aidier.
Ce ne sont pas larron ne garçon ne fossier,[3]
Ainz sunt molt preu as armes et vaillant chevalier.
El mont n’en a tex .iiii., ce puis bien tesmoignier. »
Quant Charles l’a oï, vis cuida esragier.
Dolanz fu Charlemaignes quant Aymon entendi ;
Toz les œlz li roelle, à poi ne l’a feri.[4]
Naymes se traist avant qui fu amenevis.
« Sire, dist il au roi, entendez envers mi.
Envoiez [en] Aymon : molt l’aves tenu ci.[5]
Bien poiez vos savoir, par Deu qui ne menti,[6]
Se il onques pooit, ne seraient honi.
Ja sunt ce si enfant qu’il a soef nori.
Par Deu, s’i lor aida, quant issi sunt laidi,[7]
On ne jugera pas que il soit malbailli. »
Quant li rois ot Naymon, si ot le cuer mari,
Que il savoit de voir, Aymes n’ert pas honi,
Desque jugié l’a Naymes, li rices dus flori ;
Ne le desdiroit mie, desqu’il a dit issi.[8]
Charlemaignes se lieve tot droit en son estage ;
Aymon dona congié et trestot son barnage
- ↑ 13600 Sic M. L tu ne la puez.
- ↑ 13602 Charles s’incline d’avance devant l’autorité des Pairs. Un des traits qui distinguent le troisième tiers du poème des deux premiers.
- ↑ 13607 M larron, traïtor ne murdrier.
- ↑ 13612 M a poi que nel feri.
- ↑ 13615 Sic A M. L a.
- ↑ 13616 M poviez.
- ↑ 13619 M Chertez. s’il lor aïde.
- ↑ 13624 M Sel desdiroit il mie pour le tresor Davi.
