Et Renaus fu derier, ce sachies vos de voir.
Sa gent fait entrer ens trestout par estovoir,
Et [Renaus] fu derier, [de ce] fist son voloir.[1]
Dan Richart lo Normant i prist par grant pooir ;
En la cité l’amaine où il ot son [manoir],[2]
Puis fist clore le porte où il ot son espoir.
Quant lo vit Charlemaignes, molt en ot son cuer noir
De Richart ot paor, que si vit esmovoir ;
Puis a fait la cité environ aseoir,
Puis jure Dame Dex, lo sien pere plus voir,
Jamais n’en partira, ses aura fais ardoir.
Charles asist Tremoigne, la cité principal ;
Molt jure Dame Dex, lo roi espirital,
Jamais n’en partira, si l’aura mis à mal.
Adonc parla Rollans, li nobile vassal.
« Biax oncles, ce dist il, à [icest] commençal,[3]
An avons nos lo pis et mis somes au val.
Pris est li dus Richars, nos barons principal ;
Vos n’aves un seul prince si preu ne si loial ;
Par Dex, se l’en l’ocist, il vos croist mal jornal.
De .c. pars verres Franche torner à esperpal.
Il n’ert pas sans amis, mai[nt] an a natural ;[4]
Mais crees mon conseil, ne feres mie mal.
Mandes tost à Renaut, là sus en cel terral,
Qu’il vos envoit Richart armé sor son cheval,
Puis parler[ons] d’acorde, si seies d’un coral.[5]
Il a droit et vos tort, si n’est mie egal. »
« Rollant, ce a dit Charles, dites, voles vos al ?
Par icel Dame Dex qui est esperital,
Ja à lui n’aura pa[i]s, ne li vaut .i. [poitral],[6]
N’ai garde de Richart que par lui ait nul mal. »
Challes fu en son tref, avec lui son bernage ;
[Tuit pleurent] por Richart, nesuns n’i asouage ;[7]
