Est entré] en ma terre o merveilleus conroi.[1]
Ier combati à lui par la foi que vos doi.
Si m’a torné del champ, onques durer n’i poi,[2]
Ma gent est molt malmise et tornée à belloi.
Sanpres m’asegera là dehors an l’erboi.
Charle cuidai mander ier matin sanz [deloi],[3]
Mais des que ci vos estes et des que ge vos voi,
Jamais nel manderai, si saurai lo porquoi. »
« Sire, ce dist Renaus, ge lo lou endroit moi.[4]
Mais se l’amiraus vient, il trovera tornoi.
Par icel Dex de gloire qui en la crois ot soi,[5]
Jamais ne vos lairai, issi lo vos otroi,
S’iert honis l’amiraus qui maine tel bofoi.
Mar est entrés en Puille, issi comme je croi. »
Simons fait molt grant feste de Renaut et grant joie,
En son palais lo maine qui de biauté brunoie.
Molt sont pou à loissir dedens la cité qoie,
Quant elle est estormie [et li ost se desroie].[6]
Un mes an vint au roi, qui onques ne s’aqoie :
« Hé gentiels roi de Puille, por le[s] Sains que l’an proie,[7]
Ja iert Palerne asisse de la gent qui renoie.[8]
Vez l’amiral venir qui envers vos s’avoie.
Là trancheront vos bienz, se en ne [lor desvoie]. »[9]
Quant Renaus oï dire que li amiralz vint,
Il ot tel joie au cuer, que toz liez en devint,
Adonc sailli en piés, avec lui plus de .xx.
Il vint devant Simon, si cria à cler tin :
- ↑ 16293 L Li rois est. A P manque. Je corrige d’après le sens.
- ↑ 16295 A Regnaus est descendus et trestous ces harnoiz. P manque.
- ↑ 16298 L delai. P deloi. A abrège.
- ↑ 16301 A par la foi que vous doi. P je le lo.
- ↑ 16303 P soif. A manquent les quatre derniers vers du couplet.
- ↑ 16310 Sic P. L adoncques sademoie. A manque.
- ↑ 16312 L le sainz. A le Dieu c’on deproie. P Deu que l’en deproie.
- ↑ 16313 L asissi... de la gent qui revoie. P assise de gent qui Deu renoie. A manque.
- ↑ 16315 L lor desloie. P Trenchera voz vergiers se on ne le desvoie.
