« Sire, dist li portiers, où ires vos issi ?
J’esveillerai vos freres et vos [fils] autresi.[1]
Vos n’aves pas Froberge ne Baiart l’arrabi,
S’aucuns barons sailloit, qui fust d’armes garni,[2]
A pou de covoitisse, vos auroit tost murtri.[3]
Vos fils enrageroient, ains .iii. mois acompli. »
« Amis, ce dist Renaus, il n’ira pas issi.
Ge ai fiance en Dex, qui onques ne menti.
Vos [me] dires mes freres, quant seront [esperi],[4]
Que ge lor mant salus et mes fils autresi.
« Amis, ce dist Renaus, .i. po à moi entent.
Tu me diras mes freres et mes fils ansiment
Qu’il pensent do bien faire por Dex omnipotent ;
[Et que l’un ne port l’autre ire ne mat talant] ;[5]
Si com l’ai devisé teignent lor chassement,
Jamais ne m’en verront en trestot lor vivant.[6]
Je vois m’arme sauveir, si vivrai netement.[7]
Par moi sont mort mil homme don ge sui molt dolant ;
Si doi espeneïr et soffrir maint torment,
Se puis m’arm[e] sauver, plus n’irai demendant. »
Lor garda à son doi, vit .i. anel molt gent,
Il estoit de fin or, .c. mars valoit d’argent.
Renaus l’a arechié et au portier lo tent,
Et dit : « Tenes, portier, tot est à vo comment.
Longues m’aves servi del tot à mon talent,
Or en as ton servise, ge cuit, bien veirement. »
« Sire, dist li portiers, grans merci vos en rent,
Mais molt metes vo regne et vos gens à torment.
Dex ! de si [haut si bas], molt li va malement. »[8]
- ↑ 17896 Sic A B. L répète vos freres. A B ajoutent : J’ai grant paor de vous, trop vous voi desgarni
- ↑ 17898 L B barons. A Se vous estienz là hors de larrons assailli. B qui fust vostre anemi.
- ↑ 17899 A Por pou.... murdri. B Tost vous aroit ochis et vostre cors honni
- ↑ 17903 L mes. ... reverti. B Tu me diras mes frerez et mes fis. Je corrige d’après le sens, car ils ne sont point partis.
- ↑ 17908 Sic A. L B manque.
- ↑ 17910 A B ne me.
- ↑ 17911 L marmasauver. A sauver m’ame. B m’ame seuver.
- ↑ 17923 Sic A B. L de si bas si haut.
