Puis aurommes .i. sac, si vos plaist, apresté,
Tantost iert mis dedens, toz iert, acoveté.[1]
Puis en iron au Rin, dedens sera gité.
Dont iert sargiés li sas en un bast acesmé,
Si com faison tot jors, [si sera ramené].[2]
Ja nus ne provera que aions si ovré. »
Quant li traïstre oïrent lo felon parjuré,[3]
A ce que il a dit, se sont tuit acordé.
A ce que il a dit, s’acorderent entr’aus.
Quant de disner vint ore, s’aprestent lor mertiax.
Les plus maistres maçons et les plus principax
Lo [moustier] ont laissié, si s’en [v]ont as osteax.[4]
Mais tuit cil sont rem[e]is o les cuers desloiax.[5]
En .i. anglet se colche[n]t, covert de bons quarriax.[6]
Quant veü ont Renaut qu’il n’i entent nus max,
Seoir en son anglet por faire ses aviax,
Li dui vont par deriere, antessé .ii. mertiax.
Tot por pas i aleirent come faux desleax.
Ensinc vont li traïtre que Dex puist maleïr.[7]
Quant pres sont de Renaut, si lo corrent ferir,[8]
De ci qu’en la cervele font les mertiax venir,[9]
Et Renaus [chiet] avant, l’arme en covient partir.[10]
Li traïtor l’on[t] pris, cui Dex puist maleïr ;[11]
En .i. sac l’ont boté, si l’ont fait bien covrir.
Puis en vont as ostex qui miels miels par aïr.
Molt i demorent po, ez les vos revenir
- ↑ 18173 B Puis ert mis en baiart, quant el sac ert boutés. A l’iaue l’emporteron, si sera enz getez. Puis aportron la pierre à mon baiart feré. Là nus ne porra dire qu’ainsi aions ovré. — Malgré la note de Michelant B n’a point bast, qui est donné par L, v. 18175.
- ↑ 18176 Sic A. L quant il fures alé
- ↑ 18178 L traïstres
- ↑ 18183 Sic B. L mortier, ont.
- ↑ 18184 L remis. B remes.
- ↑ 18185 L colchet. B s’esconsent contre .i. tas de quarriaus.
- ↑ 18190 B que Diex puist mal donner. Les trois premiers vers sont sur cette rime qu’il reprend v. 18202.
- ↑ 18191 L corrent. A corent. B le tes li vont fausser.
- ↑ 18192 B aler.
- ↑ 18193 L cort. A B chiet. B ajoute. Lassus aveuc lez anglez sans nisun contredir.
- ↑ 18194 L l’on.
