Trois contes sommes ci tous d’un roy engendré ;
Chascun a .vc. hommes qui tout sunt ferarmé.
Forment li aideron, se de vous est grevé. »[1]
Il jure Damledeu, qui en crois fu pené,
Qu’à lui envoiera, ja n’en iert trestourné.
Duc Naymon apela le viel chanu barbé
[Et] duc Odon de Langres a o lui apelé.
Qu’il aille à Esgremont tout le chemin ferré.[2]
.........................
Dant Tierri de Verdon a le roy apelé.
« Tierri, ce dist li roy, or soies apresté
A chevaus et à armes et à gent grant plenté.
Le matin en movres, quant il iert ajorné. »
« Sire, ce dist Tierris, à vostre volenté. »
Dant Tierri de Verdon ne s’ala pas tarjant.
Lendemain au matin, ains le soulel levant,
A il vestu l’auberc, lacé l’eaume luisant,
Et a ceinte l’espée à son senestre flanc ;
Et vint devant Charlon, l’empereour puissant.
« Sire, dist il au roy, dites vostre commant.
Irai je en mesage que alies disant,
Que manderas Bovon d’Aigremont le puissant ? »
« Tierris, dist Charlemaignes o le guernon ferrant,
Mont poise à moy du duc qui si me va menant.
De moy ne veut tenir terre ne chasement,
Ne ne me veut servir, s’en ai le cuer dolent.
Si me direz, amis, au duc que je li mant
Qu’il me viengne servir à Paris o sa gent,
A Bains ou à Loon, là où [la] court iert grant,
O .iiiic. barons armés mont richement,
Chascun [o] son destrier arrabi et courant ;
Et se il ne ce fait que je vous vois contant,
Je manderoi mes homnez et trestoute ma gent,
Trois chen mile en merrai qui seront combatant,
Qui destruiront sa terre, ne l’en lairont plain gant.
A Paris l’en merrai comme gagnon batant,
A Montmartre pendu et encroué o vent,
[Ovec] .x. de sez drus de tous les plus vallant.
Li me[ï]me son cors ferai je honte grant.
Le ferray pour Doon qui me va menachant.
Ja n’en sera garis par nul home vivant. »
« Sire, ce dist Girars, or li soit Dex aidant. »
« Tierri, dist l’emperieres, alez sans atargier,
Page:Castets - La Chanson des quatre fils Aymon, 1909.djvu/941
Le texte de cette page a été corrigé et est conforme au fac-similé.
913
appendice
