Meis plus veue esgarde qu’il n’en ont, en avom.[1]
Ferez vus en ceo que puis vus loerrom ? »
« Oïl, ceo dist li rois, sanz nule contençon. »
« Bien l’avez oï dire e de veir le savon,
Ke Bœs occist Lohier od le chanu grenon,[2]
E Charle le mandat à Paris sa meison,
Trenchier li fist la teste par desoz le menton.
Tant ala la parole qu’il vint e la reson,[3]
D’un tablier li tua Bertelai le baron.
Se il l’[e]üst feru de verge u de baston,
Se li ber se vengast, ceo ne fui si bien non ;
Meis il l’aï aukes le veil chanu baron.
Ne sai [or] quel celasse, par le cors seint Symon.
Deslivrez li Renald, cue ferez que prodhom. »
Li que[n]s de Monbendel ad apres [lui] parlé.[4]
« Sire [roys], ma resun [or] un poi entendez.
Cil [dus] vus honir velt que ceo velt louer.
Ren. est vostre hom lige et vostre ami charnel.
Quant il vint ci ad vus parut mie esgaré.
Entre lui et ses freres qui font mult à loer,
Ne sembloient pas gent qu’eüssent povreté.
Quinze destriers menoient corant et abrievé
E trente chevaliers (bien) garniz et conreé.
Li plus povre esquier aveit gris afublé.
Ainz que li quens eüst ses esperons osté,
Certes vus dist il bien qu’à Charle se iert mellé.
Si sunt les barons en la roche enserré,
E Franceis les asaillent environ de tut lés ;
Traient arcblastes et quarreals empennez,
E archiers plus de trente dunt en i ad asez.
Ja fussent pris les cuntes et malement menez,
Mais quant les veit Ogier, à poi n’est forsenez.