Durement fu penis, moult se [s]et[1] traveillier
Por conquerre la gloire au verai justicier.
En la parfin en ot moult merveillos loier,
Es ciex est coronez, ce vos os tesmoignier ;
Entre les bons apostres est asis le princier.
Baron, hui mes commence chançon a enforcier,
Que puis que Dex nasqui de la virge moillier,
Ne fu tele chantée, bien le puis tesmoignier,
Com vos porrez oïr ne se faillent denier,
Si com Renaus morut qui estoit Deu ovrier.
O mostier de Cologne dont haut sont li clochier,
Porta Renaus la pierre le nobile guerrier ;
Plus fesoit de besoigne que ne font .IIII. ovrier.
Trestot li autre ovrier quident vis enragier,
Por ce que il le voient si grant fes enchargier.
Communalment le heent li autre manovrier,
Ne vivra longuement s’il pueent esploitier ;
Et dist li uns a l’autre : Dex li doint encombrier.
Avant qu’il soit .I. an, par le cors saint Ligier,
Par l’ovraigne de li fera tot le mostier.
Ne troveron ja mes no pain a gaaignier.
Encor sont plus dolent qu’il ne prent c’un denier
Por danrée de pain que il a a mengier.
Quant vint au chief d’un mois que on devoit paier,
Devant Renaut s’en [vint][2] li mestre du mostier,
Bel et courtoisement le prist a aresnier.
Sire, ce dit le mestre, vos n’estes pas lanier ;
Aussi grant fes portez com font .X. pautonnier,
Et selonc vo service vos rendré vo loier.
Sire, ce dist Renaus, je ne veil c’un denier
Por denrée de pain que veil le jor mengier.
Ovrier seré saint Père, por mon cors traveillier,
Damedieu nostre sire m’en rendra le loier.
Quant le mestre l’oï, pri s’en a merveillier.
Sire, ce dist le mestre a Renaut le hardi,
Demandez que vos plaist, ne soiez esbahi.
Page:Castets - La Chanson des quatre fils Aymon, 1909.djvu/95
Cette page a été validée par deux contributeurs.
83
les quatre fils aymon
