la charitable. Nous en avons aussi des exemples notables en l’humanité. Cymon, fils de ce grand Miltiades, ayant son pere trespassé en prison, et n’ayant de quoy l’enterrer (aucuns disent que c’estoit pour payer les debtes, pour lesquelles l’on ne vouloit laisser emporter le corps, selon le style des anciens), se vendit et sa liberté, pour des deniers provenans estre pourveu à sa sepulture. Il ne secourut pas son pere de son abondance ny de son bien, mais de sa liberté, qui est plus chere que tous les biens et la vie. Il ne secourut pas son pere vivant et en necessité, mais mort et n’estant plus pere ny homme. Qu’eust-il faict pour secourir son pere vivant, indigent, le requerant de secours ? Cest exemple est riche. Au sexe foible des femmes nous avons deux pareils exemples de filles qui ont nourri et allaicté, l’une son pere, l’autre sa mere, prisonniers et condamnez à
