Ne fist que.iii. et si morra
Qua james forgier ne porra
Nule si bone après cestui
Tantost li sires revesti
Celui qui laienz ert estranges
De lespéé parmi les ranges
Qui valoient un grant tresor
Li ponz de lespéé estoit dor
Del meillor darabe ou de grece
Li fuerres dorfreis de venice
Si richement appareillie
La li sire al vaslet baillie
Et dist biaus sire ceste espéé
Vos fu jugiéé et destinéé
Et ge voil moult que vos laiez
Mais ceïgniez la si la reiez
Cil len mercie. et si la caint
Lasche que pas ne sestraint
Puis la trete del fuerre nue
Et quant il lot un poi tenue
Si la el fuerre mise arriere
Et sachiez que de grant maniere
Li sist el flanc et mielz el poign
Et sembla bien qua grant besoïgn
Sen deust aidier come ber
Un vaslet prist a apeler
Entor le feu qui cler ardoit
Celui qui ses armes gardoit
I vit et fi li comanda
Lespéé et cil la li garda
Page:Chrétien de Troyes - Roman de Perceval le Gallois - MS 248.pdf/102
Cette page n’a pas encore été corrigée
