Page:Chrétien de Troyes - Roman de Perceval le Gallois - MS 248.pdf/119

Si ce avenoit quele fust fraite
Sele seroit james refaite
Oil mes grant peine i avroit
Qui la voit tenir sauroit
Au lac. qui est sor le theatre
La la porroit en bien rebatre
Et ratemprer et faire saine
Si aventure la vos maine
Nalez si chier trabuchet non
Un fevre qui issi a non
Que cil la fist et fera
Ou james refaite ne sera
Par home qui sen entremete
Gardez qualtres la main ni mete
Quil nen savroit. venir a chief
Certes. ce me sera moult grief
Fait Percevals sele fraint
Lors sen vait et ele remaint
Que del mort partir ne se vielt
De la qui mort li cuiers li dielt
Percevals la sente sen va
Toz les escloz tant quil trova
Un palefroi moult maigre et las
Qui devant lui aloit le pas
Del palefroi. lui ert avis
Tant estoit maigres et chaitis
Quil fust en males mains cheuz
Bien traveilliez et mal peuz
Sembloit quil eust este
Si come len fait cheval preste