Page:Chrétien de Troyes - Roman de Perceval le Gallois - MS 248.pdf/61

Ne vin. ne sydre. ne cervoise
Vers un palais. covert daroise
Lont. li.iiii. serjant mene.
Et descendu et desarme
Et tantost uns vaslez avale
Parmi uns degrez de la sale
Qui aporta un mantel gris
Au col. al cheval. la mis
Et uns altres a estable
Son cheval. la ou il na ble
Ne fein. ne fuerre si poi non
Car il nestoit en la maison
Li altres devant els la font
Monte par les degrez amont
En la sale qui moult fu bele
Dun prodome et une pucele
Li sont a lencontre venu
Li prodome estoient chenu
Non pas. si que tuit fussent blanc
De bel aaige atot lor sanc
Et a tote lor force. furent
Sennui. et pesance. neurent
La damoisele fu plus cointe
Et plus acesméé et plus jointe
Que espreviers ne papegauz
Ses mantiaus estoit. et ses bliauz
Dune porpre noire esteléé
Dor. et nestoit mie peléé
La pene qui dermines fu
Dun sebelin. noir et chenu