tant par la ſusdite définition, que par les deux ſuivantes.
11. Angle obtus, est celuy qui eſt plus grand qu’un droict.
12. Mais l’aigu, est celuy qui est plus petit qu’un droict.
Quand une ligne droicte tombant sur une autre s’incline ou panche plus d’un coſté que de l’autre, elle fait consequemment deux angles inégaux, dont l’un est plus grand que l’angle droict, & se nomme angle obtus ; mais l’autre est plus petit, & s’appelle angle aigu. Ainsi pource qu’en cette figure, la ligne droicte EC tombant sur
la ligne droicte AB, s’incline & panche plus du coſté de AC que de la part de BC, les deux angles du poinct C ſeront inégaux, & celuy vers B, qui eſt plus grand & ouvert que le droict ſera dit angle obtus : mais celuy de la part de A, qui eſt plus petit & fermé que l’angle droict, ſera nommé angle aigu.
Et d’autant que ſouventefois en un plan concurrent plus de deux lignes à un même poinct, & par conſequent y conſtituent pluſieurs angles, les Geometres ont accouſtumé (pour eviter confuſion) d’exprimer l’angle dont ils parlent par trois lettres, deſquelles celle du milieu denotte le poinct auquel les lignes conſtituent l’angle, & celles des extremes signifient les commancemens d’icelles lignes qui font iceluy angle : tellement qu’en la figure cy-dessus l’angle obtus que nous avons dit eſtre celuy de la part de B, ſera exprimé & entendu par ces trois lettres ECB ou BCE, à cauſe qu’il eſt constitué au poinct C, & contenu par les deux lignes droictes EC, & BC, qui commançant en E & B, ſe vont rencontrer au susdit poinct C. Mais l’angle aigu que nous avons dit eſtre de la part de A, s’exprimera par ces trois lettres ECA ou ACE, par ce qu’il eſt constitué au poinct C, & fait par les deux lignes droictes EC & AC, qui commencent en E & A, & se vont rencontrer au suſdict poinct C. Ce qu’on doit bien notter, afin de connoiſtre & diſcerner facilement les angles, dont sera faict mention és démonſtrations ſuivantes.
13. Terme, eſt l’extrémité de quelque chose.
Ainsi les poincts ſont termes ou extremitez des lignes, les lignes des ſuperficies, & les ſuperficies des corps.
14. Figure, eſt ce qui eſt compris & environné d’un, ou de pluſieurs termes.
Toute quantité ayant ternies, n’eſt pas dicte figure : mais ſeulement celles
