sa paroisse estoit fondée sous le titre de St Estienne, qu'il y avoit dans Caille environ cent et nonante ames de communion, qu'il y faisoit le service tout seul, et que les Dimanches et les festes il y disoit la ste messe et chantoit vespres, qu'il faisoit le prosne les Dimanches, que depuis la Toussaints iusqu'à la Pentecoste il y faisoit la doctrine chretienne, disoit une messe de requiem tous les lundis, que tous les habitans avoient satisfait au devoir pascal, qu'il y avoit premierement la Confrerie du St Sacrement, secondem[en]t celle du Rosaire et troisiemem[en]t le Mont de pieté, et qu'enfin par la grace de Dieu il n'y avoit dans Caille aucun heretique à la reserve du Seigneur de Caille.
Nous eveque en pourvoyant aux necessités de la paroisse de Caille, confirmons tout les ordonnances de nostre predecesseur que la nostre du vingt deuxieme juin mil six cens ceptante trois, et pardessus icelles avons ordonné qu'aux depens de messire Imbert prieur dudit Caille et de l'econome du chapitre de nostre cathedrale de Vence et de messire Laurens Blacas chanoine dudit Vence et de messire Fort vicaire d'Andon, prebandés et perçevans dixmes audit terroir de Caille, le pied du soleil dont on se sert pour exposer le S. Sacrement aud. Caille sera faict d'argent et ce dans huict mois autrem[en]t[1] à defaut de ce interdisons le dit soleil et defendons au S. prieur de Caille de s'en servir plus à l'advenir pour exposer le S. Sacremt. Avons de plus ordonné qu'il sera achepté une navette et cuilliere de leton, interdisant celles de bois dont le sieur prieur se sert, et quant au cimetiere confirmons nostre ordonnance d'interdit du vingt deuxieme juin mil six cens septante trois, si led. cimetiere n'est entouré de murailles à chaux et sable dans huict mois.
Deliberé à Caille le vingt neuvieme aoust de l'annee mil six cent soixante dix sept
Louis E. de Vence
- ↑ Lecture incertaine
