Visite du lieu de Sainct Laurens[1]
Nous Louis de Thomassin par la grace de Dieu et du Sainct Siege ap[osto]lique evesque et seigneur de Vence conseiller du Roy en tous ses conseils scavoir faisons que ce jourd’huy dix huictiesme novembre presente année mil six cens septante sept appres avoir achevé nostre visite de la paroisse du lieu de La Gaude nous serions partis dud. lieu led. jour dix huict novembre sur les unze heures de matin pour aler au lieu de St Laurens faire aussi nostre visite de la paroisse dud. lieu y donner le sacrem[en]t de confirm[ati]on et pourvoir aux autres[2] besoins et necessités de lad. paroisse * et arrivés aud. lieu sur les deux heures appres midy nous aurions eu a nostre rencontre Mess[i]re Jean Albanelli prieur, Mess[i]re Adham Robaud son secondaire et autres aparents du lieu qu’ils nous auroit conduit dans la maison claustrale pour le lieu de nostre retraite * en compagnie de notre aumosnier, greff. et autres de no[st]re suite Et l’appres disner ils seroient veues [sic pour venus] dans ladicte maison claustrale les sieurs consuls accompagnes des plus apparents du lieu, lesquels appres nous avoir salué et faict la reverence, nous luy aurions dict s’ils avoient quelque plainte a nous fere de nous le dire et declarrer affin d’y pourvoir, dequoy ils nous en auroient très humble[men]t remercié et tesmoigné qu’ils n’avoient aucune plainte à nous fere estants fort satisfaicts de leur prieur et de son secondaire
