Et cielz soi s’est retrès arriere,
Et rentré sont, en la barriere
Dou chastiel, dames et pucelles,
Qui laiens portent les nouvelles
Que li chevaliers est prisons
Qui par tant est gratieus homs,
Et que Camelz l’a desconfi.
Gratiiens fu tout a par li
Mis en une cambre moult belle.
On mist son cheval, et sa selle
Et ses armeüres a part.
Dou chastiel mies ne se part,
Ne partir ne poet nullement,
Se ce n’est au commandement
Dou dit Camel ou de Florée.
Moult se dementa la journée
Messires Gratiiens assés
Et dist : « Or est mes temps passés ;
« Or ai je perdu ma saison !
« On me fait ci tenir prison
« Et je deuisse chevaucier !
« Nul homs ne poet son encombrier
« Eschiewer par nesune voie.
« Or n’arai jou honneur, ne joie,
« Jamais, pour cose qui m’aviegne.
« C’est bien raisons qu’il me souviegne
« Que le premier an de no queste,
« J’ai trouvé le temps si rubeste
« Que chi me faudra sejourner ; f. 45 a
« Et tout cil qui oront parler
« De moi s’en trufferont ossi. »
Gratiiens se demente ensi,
Et ses escuiers ce qu’il poet
Le conforte, lors qu’il se doelt.
Ossi fait a le fois Florée
Qui ne dist mies sa pensée,
Page:Froissart - Méliador, tome 1.djvu/253
Le texte de cette page a été corrigé et est conforme au fac-similé.
173
Méliador
