« Sire, nous irons a ma dame ; f. 4 c
« Autrement arions nous blasme. »
Il repondi : « Alés, a Dieu. »
Adont s’en sont venu ou lieu
Ou Florée estoit toute preste.
Dit li fu : « La dehors s’arreste,
« Ma dame, uns chevaliers voisins.
« Dit nous a que c’est vos cousins.
« Le lairons nous ceens entrer ? »
— « Oïl, quoi dont ? sans arrester.
« Il ne vient fors que pour esbatre ;
« Se ne li devons pas debatre
« L’entrée ne la compagnie,[1]
« Ou on li feroit villonnie,
« La quele ne li voel pas faire. »
Lors les gardes, sus cest afaire,
L’ont laissiet errant en la porte.
La vient Florée qui li porte
Grant solas a lui recuellier.
Cilz qui ot corps de chevalier,
Bel et gent, et de bonne taille
(Voires se il n’euist la maille
De reproce ditte devant),
S’est courtoisement trais avant
Et conjoïst les damoiselles
Doucement, et dist : « Voir, mes belles
« Dames et voisines ossi,
« L’autrier me reçuïstes si
« Liement et a bonne ciere,
« Que j’en suis revenus arriere
« Pour vous loer et graciier,
« Et de vo bien remerciier. »
— « Messire Camelz », dist Florée,
« Vous dittes ce qu’il vous agrée,
- ↑ 451 L’entrée, B Lentre.
