Cil d’Irlande, pour le peril
Eskiewer d’yaus et de leur terre,
Car fort se veoient en guerre,
S’aviserent c’un roy feroient,
Mais avant il envoieroient
Apriès Dagor et Saigremor.
Il aroient en grant restor,
S’il avoient leur hiretier,
Le fil dou roy qu’il orent cier,
Dont se tinrent sus cest avis
Et envoiierent, ce m’est vis,
Sis chevaliers de leur contrée,
En Galles, qui est renommée,
En la court dou bon roy Artu.
Sitost que leur venue fu
Sceüe, li rois leur fist joie
Et leur dist : « Signeur, je vodroie
« Que vous reuissiés vostre enfant. »
Lors leur compte le couvenant
De li, et comment il l’arma
Et ossi comment se porta
Au behourt bien et vaillanment.
« Mais il parti soudainnement f. 195 b
« De moy, dont je sui courouciés.
« Ses mestres ossi, ce saciés
« En ot moult grant compassion ;
« Puis li vint la devotion
« D’aler apriès li, sans attendre,
« Et congiet en vint a moy prendre.
« Quant je l’en vi atalenté
« Et en si bonne volenté,
« Je li consillai sans sejour ;
« De puis se parti en brief jour.
« Je ne sçai voir quel part il sont. »
Et quant telz parlers oÿs ont
Li chevaliers irois, en l’eure,
Page:Froissart - Méliador, tome 3.djvu/143
Le texte de cette page a été corrigé et est conforme au fac-similé.
138
Méliador
